ΤΟΥ ΓΙΩΡΓΟΥ ΣΙΑΠΑΝΙΔΗ

Απόσπασμα από το θεατρικό έργο του Γιώργου Σιαπανίδη.

Η ελευθεροστομία στην καθημερινότητα των Ποντίων, θεωρώ πως έχει καταγωγική σχέση με την αισχρολογία στους μωμόγερους.

ΓΡΑΙΑ: (Περιφερειακή πρόσωπο της καθημερινότητας).

-΄Μώ σε χώρα, αούτο πα δουλεία εν’ ντο έπαθα. Τ’εάμεσε με ο γάιδαρον… Εσυνορθίασα τ’ οσπίτ’ και τεά θα πάω εφτάω σεΐρ τα Μωμοέρα. Εφόρεσα τα καλά τα λώματα μ’, εσεμέρωσα το γάϊδαρον τον Κίτσον, εκρέμασα και το τσαντάι με το συφάϊ μ’ και καβαλαρέα εχπάστα. ‘Μώ σε χώρα, τ’ εάμεσε με ο γάιδαρον… σο ρδόμον ελέπ’ ο Κίτσον τη γαϊδάραν του Χιώτη, βόσκετε απές στο τριφύλ’. Κουράζ’ το ρδόμον και κλώσκεται ση γαϊδάραν μερέαν. Α.α.Α.α… ογκαρίζ’… η γαϊδάρα μασά τη μαστίκαν…

-Εγώ η άχαρος σύρω το δουκάλ’, έλα Κίτσο, έλα Κίτσο, να ψωμίν… Ο Κίτσον εάμεσαν αοίκα. Αράζ’ απάν’ ‘ς ση γαϊδάραν, εγώ απάν ‘ς σον Κίτσον, δελιάουν τα σκοινία σα ποδάρα μ’, λύεται το σεμέρ’, ξύουν τα φαΐα, ρούζω και κοτσομεσάουμαι.

-Ούι – ούι τ’ εάμεσε με ο γάιδαρον γυναίκ’. Γελάτεν, γελάτεν, αμα ατά ντο λέω ‘σας ‘γονότα είναι… ‘γονότα, γραμμένα σο καύκαλον τ’ ανθρωπί’. Ατώρα ο γέρον τ’ εμόν πουθέν επαίρεν σ’ ομμάτα ‘σουν…